Kum Thar le Jacob

Israel miphum pahleihnih hna hringtu Jacob zong nun ah chummui a rak tlung. A pa ro a fir khanh caah a u Esau nih ka pa a thih khawh, ruak ifimtawl dih bak in ka thah lai a timi a si. Fapa tlaupa nakin a sual deuh. A min “Jacob” i a suallam hrimhrim hi hlenhmang tinak a si. A nu nih a pu Laban sinah zam a fial. A khuallam hi tih a nung. Sahrang nih seh khawh a si. Damiah nih vuak khawh a si. Khuallam ah zawt i thih khawh a si. Ni a hun liam paoh ah riahbuk iserh i ih colh a si. Lung ai tlinh i ai hngilh lio ah a pu Abraham le a pa Isak hna i an Pathian nih a chawnh. Miphun lian ah kan ser lai, na ram a kau lai, na tefa an karh lai, a ti. Cu pawl cu a fian zong a fiang lo, a lung zongah an lut lo. Khuazei na kalnak paohah kan umpi lai, a hun timi biafang lanwg nih a lung a tawngh. Mi sual a si ko lio ah Pathian nih caan ttha thar a ka pek rih ti ai hngalh. Ka cungah vel a ka ngeih rih ti ai hngalh. Pathian umpinak tangah cun ka him lai ti zawng a zumh. Cun Pathian sinah biakamthar a ser ve. 2024 Kum Thar a phan mi paohpaoh  caan ttha thar pek kan si ve. Biakam thar na ser ve cang maw?

Roling tukmi biakamnak: “Atu ka khualtlawnnak ahhin na ka umpi i na ka huhphenh i rawl le hnipuan na ka pek i ka pa inn ah him tein ka kir ṭhan ahcun nangmah cu ka Pathian na si lai. Philh lonak lung ah ka phunmi lung hi na inn a si lai i na ka pekmi thil vialte cheu hra ah cheu khat kan pek lai,” (Gensis 28:20-22). Pathian pennak chung vun luh cu hihi a si. Hmai zarh ah, hmai kum ah tiin rian i chiah, saduhthah thah men hi Sehtan pennak tang i kan um lio te a si ( Dr. Stan Coffey). Cun Khrih tu kan Bawi ah siter hmasa loin kan ziaza i remh i timh hmasa cu a hlawh a tling tlai lo. Kan zia cu ai thleng kho tak men ko lai nain Khrih kan Bawi a si lo i kanmah ca lawngah kan nun tthiamtthiam ko ahcun hrinthan tthang a si lo (Andrian Rogers). Bawipa, na caah mahhi tal cu ka tuah ve lai vun ti khawh khi Jacob nih Pathian vel a theihnak a langhnak a si.

Harnak tong loin a um hlei lo. A pu Laban nih nupi kongah a hlen, ttuan man kongah a hlen. Asinain Pathian nih a umpi kha Jacob nih a theih peng. A pu Laban cu hitin a ti:  “Na fanu pahnih hna caah kum hleili kan rianh i na saṭil run hna caah kum ruk kan rianh. Cu na hmanh cun ka hmuh hnga ding ka ṭuanman kha voi hra te na ka thlen. Ka pa Pathian Abraham Pathian, Isak nih a biakmi Pathian nih khan rak ka umpi hlah seh law kut ro in na ka kalter ko hnga. Asinain Pathian nih cun harnak ka inmi le ka rianṭuanmi kha a hmuh i zahan ah bia a kan ceih cang,” (31:41-42). Pathian nih a pa inn ah kir a fial. A u Esau kong ruah ah ttihnung tuk hoi. Hmanhseh Pathian nih kan umpi lai a ti. Voi sarih vawlei ah a kun i a u cu ngaihthiam a hal. Palhnak ah ka palh ti khawh hi Pathian umpinak hmual a si. Zeizong te a hung i lim. Bethel hmun Pathian inn leiah kal ding a si cang. A nupi le hna nih an pa sinin siasal an i kenmi le an hnatawnh vialte thingkung tangah a phum ta dih hna. Bawipa fuh lioah dontu kan siasal hna hi phum ta ve ding an si. Na siasal lakah ttih a nungbik cu Jesuh nakin biapi deuh i na chiahmi thil hna kha an si.

Categories: Uncategorized

Leave a Reply