Langaak Si Ka Duh Ko

Minung nih Pathian an i bochan ti lo ahcun thil dang zeihmanh an zum kho ti lo an ti tawn. A taktak ahcun Pathian a zum lomi nihcun thil dang vialte kha an zumh i an hna bei a sei peng (G.K. Chesterton). Pathian a zum lomi le Bible ca a cohlang lomi nihcun anmah nih a duhmi kha Pathian ah an i ser. A hman le hman lo bia caihtu ah Pathian bia siloin anmah le anmah kha an i chia. Ahab siangpahrang hi Israel siangpahrang a pasarihnak a si i amah hlan siangpahrang vialte nakin thil tha lo tambik a tuahtu a si (1 King 16:30-33). King 21: 25 ahcun, Ahab bantuk mi sual a dang hohmanh an um lo, a ti. A sualnak bik cu Pathian kha a hnulei a chit i Baal Pathian kha a bia. Baal timi cu “bawipa” tinak a si i Canaan mi le Phoenician pawl nih an rak biakmi Pathian a si. Baal nih faneih khawhnak le khuaticaan thatter khawhnak a neih tiah an zumh. Khua ticaan thatnak caah an fater kha rai an thawi hna. Faneih khawhnak caah nu hlawhhlang le palhawh hlang an tuan. Pathian nih mah bantuk pathian hi nan bia hrimhrim lai lo tiah bia rak tianmi hna kha Ahab nih a zulh duh lo kha a sualnak bik a si (Deut. 6:14-15). Pathian zumh lo cu khuachia biak a si. Mah le mah i biak a si.

Minung tampi nih Ahab bantukin Pathian kan zum tak kho lo. A ruang cu Jeff Strite nih phunli in a chim:
1) Anmah nih an fian khawhmi Pathian lawng an duh. Anmah duhning in thluachuah petu le midang dantattu lawng an duh. Pathian kha anmah hngalknak bawm chungah khumh i hrilhfiah an i zuam. Anmah duhning he ai kalhmi paoh cu hnulei an chit tak. 2) Pathian a zum ve lomi hna bia an ngaih. Ahab nih a nupi Jezebel bia a zulh. Jezebel cu an chuahkehnak in Baal a biami an si i Pathian Prophet Elijah zong thah awk ah a kawlmi a si. Rumnak, bawinak le taksa nuamhnak kha pakhatnak ah a kawlmi a si. 3) Fahnak an ton caah Bawipa an mer tak. Hi tluk harnak fak kan tonmi hi cu Pathian a um tak lo i a si ko lai, an ti. 4) Sualnak lian an tuah caah an kal tak. Ka palh ti a duh lomi an si. Pathian bia nih sual phawtmi si an duh lo. Sualnak kha sualnak dang in thuhnawh an zalh. Elijah bia an neih duh lopinah that in an dawi. Naboth dum an chuh duh ah amah an that beth. Cubantuk Pathian zum lo le a bia a mer tak thaimi hna cu an donghnak khuaci a mui. Jezebel ruak cu uico nih an ei dih. An cikor zong hmih dih an si. Pathian nih leh rul a cham hna tinak siloin in thihnak lam kha anmah tein an i thim a si.

Pathian kha a zum i a duhnak zulh ai zuammi Elijah cu langaak nih rawl a pek. Langaak cu: 1) A pumpaluk a nak dihmi va hnawmtam a si an ti, 2) A sa ei awk tha lomi va a si an ti, 3) A eimi rawl hi a thu i a thengmi lawngte a si an ti, 4) A fale hmanh rawl a hrawmh duh lomi va phun a si an ti, 5) A sining ai phuhrung i hawi sinah a lang ngam lomi va a si an ti. Sinain Bawipa nih a prophet Elijah rawl petu ah a hman ko. Langaak a fimnak bik cu nawlngaihnak a si. Mi nawl ngai cu khua awng an tong, Bawipa nih chungkhar chanhtu ah a hman hna. Ahohmanh nih zumhnak loin Pathian lungton khawh a si lo; zeicahtiah Pathian a fuhmi paohpaoh nih cun, Pathian cu a um i amah a kawlmi cu laksawng a pek hna, ti kha an zumh awk a herh (Hebrew 11:6). Pathian nih amah a zumtu hna cu kum khat ca men in si lo, an chuah in an thih tiang, an techin fapar ca tiang in khua tha a khan piak. Zeitintiah vawlei cung dihlak ah hin Bawipa mit cu aa chawk dih i amah lei i an lung soisel awk a um lomi hna cungah a ṭhawnnak kha a langhter (2 Chanrelnak 16:9).

Categories: Artical

Leave a Reply