Life/Hope

Sii lei sibawite nih khuachia fak tuk ruah loin lawm tein nun aa zuammi hna cu an ngan a dam deuh, an ti. Nitinte an i lawmhnak phun nga lengmang a relmi hna cu thlaruk a ruah tikah an ngandamnak a ṭhang, an ti. A lungre a thei pengmi, a ing a puang lengmangmi hna cu an kum a no ko nain an thluak a tar, an ti (Feeling Great About Life by Ryan Heller). Nuamhlonak a chuahpi bik tu cu hakkauhnak, nahchuahnak, uahnak hna an si. Cangvat nih fanu pahnih a ngeih hna; pakhat nih, “Ka pe,” a ti i a dang pakhat nih, “Ka pe,” tiah a ti ve. Thil pathum cim hngal lo an um. Cu hna cu Sheol le a cingmi chul le a ti a hal zungzalmi vawlei le “A za cang,” a ti bal lomi mei an si (Ptb. 3:15-16). Mi hngar, mi nih lonh lai phan, mi tling lo cio kan si, ti cohlan khawh lonak hna nih nun rethei berbur in mi a tuah. Hi vialte hi Pathian i bochan tak lonak in a chuak.

Zei dirhmun i dir zong ah a nung rihmi paoh nih cun i lawmh khawhnak lam a um ko. A sangmi ṭhutden in ṭum ding a si zong ah. Kan chawva a ṭumchuk zong ah. Dawtmi he i ṭhen zong ah. Hawi ṭha i ruahmi nih deuh zong ah. Dam lo caan zong ah. A thi ding si hmanh ah. Philh lo ding: Dirhmun sang rak um khawh caan, dawtmi he caan nuam rak hman ṭi caan, Hawikom ṭha he rak tlawnlen lio caan, rak dam lio caan, tiin rel cawk loin Pathian dawtnak a um. A luan ciami caan ah a rak ing tuar tuk mi rak si zong ah thaizing nih ni thar a chuahpi lai. Caan nih duh lomi thil a liam pi lai. Ibuaipi cio mi hi, vawlei buainak dang lengluang lakah pakhat hnih te men khi an si. Mi nih soiselnak le thangchiatnak vialte cu taksa le thinlung ah aa benh lo. Khrih dawtnak tu thinlung ah aa benh cang. Khrih dawtnak ah mi vialte kan i tlum dih.

“Pathian thimmi cu aho nih dah sual an puh khawh hna lai? Amah Pathian hrimhrim nih pei, nan sual lo, tiah a ti hna cu. Cucaah annih cu aho tal nih sual an phaw kho hna lai maw? Khrih hmanh nih sual a phaw hna hnga lo; zeicahtiah an ca i a thimi kha Khrih Jesuh kha pei a si cu, cu nak hmanh cun, thihnak in thawhter a si i Pathian orhlei kamah a um i kan ca i a kan nawlpiaktu cu amah cu pei a si cu. Cucaah aho nih dah Khrih dawtnak he cun a kan ṭhen khawh lai? (Rome 8:33-35). Hi Cathiang nih thleidan mi minung a ngei lo.

“Mi zeihmanh”!!!
“A zummi paoh”!!!
“Pa duhnak tuahmi paoh!!!
Vawlei nun thar le zungzal nunnak an ngei lai (2 Kor. 5:17, John 3:16; Mtt. 7:21).

Mizei ka si hmanh ah Bawipa cu ka lawmh lai. Zeicatiah a ka ser i a ka dawt:

* A dawtnak cu zungzal in a hmun (Keimah le keimah kaa chim lai).
* A dawtnak cu zungzal in a hmun (Ka chungkhar sinah tette ka khan lai).
* A dawtnak cu zungzal in a hmun (Zapi sinah ka phuan lai).
Psalm 136:1-3

Categories: Uncategorized

Leave a Reply