Mother’s Day

US ram ah nule ni an tuahnak hi kum 102 a si cang. Anna M. Jarvis timi nu nih kan nule upat peknak tuah ding in caan saupi a aupi hnu ah US President Woodrow Wilson nih May zarh hnihnak paohpaoh cu nule upat peknak in caan hman ding tiah 1914 ah a rak ti. Pumpak in nule dawt nak langhter caan lawng siloin US rammi nule vial cungah kan miphun ningin kan duhdawtnak hna le upatnak langhter ni tiah a rak chim chap. A voi 26 nak US president a rak tuanmi Theodore Roosevelt nih, US ralkap US ram ca i ral a tu cuahmah mi nakin kan nule hi US citizen tha deuh nan si. Fale tha tein a zoh i a ra laimi chan caah fanu fapa tha a kan serpiak tu kan nule hna hi kan mibu caah pa vialte nakin nan biapi deuh. Cu bantuk kan nule cu sipuaizi thiam pa, scientist pa, uktu bawi pa nakin upat an tlak deuh, a rak ti. Nupi le riantuan loin inn kan rak hngahter hna i pa nih kan cawm hna kan rak ti tawnmi ruah he cun ai ralchanh ngaingai.

Vawlei cung pasal tha, nusal tha tampi hna nih an nun an i check than tikah an hmet lio an nule thawngin atu an dirhmun an phak khawhnak si an ti cio. A voi 16 nak US president a tuanmi Abraham Lincoln nih: Pathian a thei i fale caah thla a cammi hringtu nu a ngeimi paoh cu an si fak lo, a ti. Ka nu thlacam piaknak nih nihin tiang thluachuah he a ka dawi peng i ka nun lam chungah a benh in an i benh. Cham cawk lo leiba ka neihmi cu ka nu sinah a si, a ti. Dawtmi ule nau hna kan nule kan chawnh rih hna lo ahcun tu zan tal, tu zarh chung tal ah chawnh i zuam hna usih. An sin kan um ti lo zongah kum khat ah voikhat te upatnak pek i kan dawtnak hna langhter cu mizei nule paoh nih an i tlak dihmi a si. Mother’s Day caan i nule nan chawnh tikah bia el lo tein an chimmi paoh Amen ti i zuam ah a tha (Rev. Brad Whitt). Nule nih thla campiak rihmi fanu fapa si hi a rak sunglawi tuk hringhran. Hna a ngam, Pathian hnakkar ah tenhmi kan si rih tinak a si.

Hringtu nule a nei ti lomi tampi kan um fawn. Mother’s Day hi ngaihchiat ni, zun ngaih ni, pumhnak hmanh phak huam lo ni ah a cang. Pastor Jerry Vines nih a chimmi bia hin thazang la hna usih: Hringtu nule um ti loin Mother’s Day kan hman caan ah kan nule cu Vancungkhua kan Pathian sinah thadam tein an i ding cang timi kan philh lo ding a si. Vawlei lungretheih le sifah harnak an tuar ti lo. An mitthli tla ti lo. An ingtuar ti lo. An thi than fawn ti lai lo. Kan caan a tlin ve tikah Vancungkhua in a kan dongtu an si te lai. Kan hmet tein Pathian kong a kan chimtu an si i, kan thih tikah Pathian he a kan dongtu kan nule an si. Pathian sal tha Timothy zong kha a pitar le a nu zumhnak thawng in zumhnak a fekmi rinh thlak sal tha ah ai chuah. Na pi Lois le na nu Zunis nih an ngeihmi zumhnak bantuk, zumhnak taktak na ngeih kha ka hngalh i atu zongah hin na ngei ko tiah ka zumh. Cucaah na cung i ka kut ka rak chuan tik i Pathian nih an pekmi laksawng kha na nunter peng nakhnga chimh ṭhan kan duh, tiah Mithiang Paul nih a chimmi kan hngalh (2 Timothy 1:5). Atu ah nule a si lio mi kan nule hna nih 1) Pathian i bochan peng ding, 2) Fale zong Pathian i bochan ding ah cawnpiak peng ding, 3) Thlacampiak le Bible relpi i zuam peng dingah kan sawm hna.

Tags: ,

Leave a Reply