Nunnak Battery Tuntu

 

Pa ka si. Ka mit a pawl. Ka sam a nak. Pe nga le lehmah panga ka sang. Pawng za le sawmli ka rit. Kutke tlamtling in ka nei. Ka mit, ka hna, ka kutke an tha dih. Ka mui cu chia pah nain tha chiatuk ka si lo. Ka duhmi ka ei, ka din khawh. Hnipuan a za tawk kai neih. Honda Pilot zero mileage cawkka mi bantuk te khi ka si. Ni khat ah meng thong hnih kal kho ding ka si. Sinain kar khat hmanh kai thial kho lo. Ka um hmun ah ka dir peng. A ruang cu ka battery a dawng.  Kan mawtaw a battery a rawh tikah ai start kho ti lo. Sobul in ka den, a rawk chinchin. Cu tikah a dang battery kha kan va hlan i tha kan pek than. Minung kan pu zong hi a dam ko nain a cang kho tawn lo. A raung cu kan lungthin, kan zumhnak thazang a dih caah a si. Kan lungthin  thazang a der tikah sobul nih a kan remh kho lo. A kan fahter chin. Thazang petu kan herh ve. Cucaah vawlei khamhnak ding caah ti le mei hmang tiloin a fapa neihchun te tu kha a kan pek. Lungthin a dermi vialte ka sinah ra uh, a ti.

Mawtaw bantukin minung cu battery thar bunh awk kan tha lo. Mi pakhat battery pakhat cio lawng pek kan si. Hlawnh awk zong a tha lo, thlen awk zong a tha lo. Cawi awk le chamthan awk zong a tha lo. Kan bettary a hrawktu cu kan ral nganbik an si. Kan bettary tuntu cu kan nun chanhtu an si. Minung le minung hi bettary ai tun ding kan si. Caan tampi cu a khangh tu in kan i khang theu. Mi nih an kan khangh chel, kanmah le kanmah kan i khangh chel a si tawn. Cucaah midang kha kan ral an si kho i kanmah le kanmah zong kan ral kan si kho. Sobul hmang in mi bawmh kan i timh ahcun mi dengtu ah kan cang. Cucu law i a rian a si.  Khuaruah i palh ahcun kanmah le kanmah kan i khang ve. Cucu sehtan rian a si. Minung hi a tling lomi kan si, vawlei hi duhtlin lonak ram a si timi hi kan cohlan hrimhrim cio a hau. Mi dang kha an sining tein cohlan khawh a herh bantukin kanmah le kanmah zong kan i cohlan a hau. A tlingmi cu Pathian lawnglawng a si i duhtlinter khotu cu amah Pathian zumhnak lawnglawng a si.

Battrey rawk le battery rawk an i tun kho lo. Lungthin dermi le lungthin dermi an i bawm kho lo. Kum hleihnih thi chuak nu nih Jesuh puanki a tawngh tikah Jesuh nih, ka thawnnak a chuak, a ti. Thinlung zumhnak thawngmi nih a dermi an bawmh khawh hna. Battery full mi nih a dawngmi a tun khawh. Minung cu vawlei harnak a phunphun nih den ciomi kan si caah kan zumhnak, kan lungthin a thawn caan, a der caan tiin a nung ciomi kan si. Kan thinlung hi hakkauhnak cirik, nahchuahnak cirik, pumsa duhnak cirik nih a ei tikah kan battery ai tunning a hman tawn lo. Cucaah Bawi Jesuh nih, zedang vialte nak in Pathian duhnak kha kawl u law thil dang vialte cu chap chih nan si lai, a kan tinak cu a si. Minung hawi nih an in theih thiam lo i lung thin der i na um ko rih a si ahcun Bawipa Jesuh sinah rak kir ve cang. Na nunnak baterry tuntu Bawipa cu nan nunnak in colhlang ve cang.

Categories: Artical

Leave a Reply