Palm Sunday le Kan Bawipa

Palm Sunday cu Thawhthan lai zarh ah tuahmi a si i, kan bawipa Jesuh Khrih Jerusalem ah sunglawi ngaiin a luh zarh kha a si. Kan Bawipa cu laa note ai cit i mipi hna nih tum hnah in an don i.  Aa cit mi laa nih nawl ngaihnak kha a langhter i an donnak tum hngah nih ral teinak kha a langhter, an ti. Palm Sunday cu vawlei cung Khrihfa vialte nih mah le khrihfabu cio ah tuah a si i RC pawl nih cun nihini tiang “Bawipa min in a rami cu, thangthat si ko seh!” tiah an au peng. Lai tlang zong ah church school fale hna cu kuhchuk hnah i put in khua lu khua taw an kal i Bawipa min an thangthat ni a si. Hi ni ah kan ruah ding thil pathum a um.

1) Palm Sunday zarh lai ahhin kan Bawipa cu ka caah a in dingmi thihnak a ruah ah a tih tuk hrinhran i a zultu kha thlacamnak ah ka zul uh tiah a sawm hna. Cu tluk in a lungre a theimi an Bawipa cu an hgnilh tak dih. Pope Francis nih, Palm Sunday caan ah hin Bawipa caah kan i hngilh le hngilh lo kan hal awk a si a ti. Kan Bawipa cu sifak misual kan caah a lungre a thei pengmi a si. Keimah caah a lungre a thei. kan chungkhar caah a lungre a thei. Laimi mipem kan caah a lungre a thei. Kan nih nih kan hngilh tak diam sual maw?

2) Palm Sunday khawh bak ah kan Bawipa cu an tlaih i Rome uknak dotu a si tiah taza an cuai. That a duhmi Judah hruaitu nih a phunphun in a that lonak an chim. Cu lio biacaih bawi cu Pontiac Pilate a si. Biatka kha tanh ngam loin a kut tu kha ai tawl i taza a cuaitu mipi sinah kan Bawipa Jesuh cu a ap hna. Khrihfa chungah harnak kan ton caan le thil kan duh lo ningin a kal caan le thawhbur hna a tam deuh caan hna ah a kut ai tawl diammi kan si maw? Anih ruangah, amah ruangah, anih nih tuah, anmah nih thawh hna seh tiah kan um tawn maw?

3) Palm Sunday i kan Bawipa sunglawi ngaiin a dongmi mipi hna cu a hmaizarh biacaihnak zung hmai ah an hung chuak than hna. Biacaihtu nih a sual lomi Jesuh cu thah ding a duh lo caah luatter nak lam a kawl. Lantak puai fatin thongthla pakhat luatter khawh a si. Cu lioah thongthla an neihmi hna cu Jesuh le mifir Barabas an si. Palm Sunday i kan Bawipa a dontu mipi hna cu hi biacaihnak ah, thah si ko seh! tiah kut a thlirtu an si than. Khrihfa kan sinak ah mah i khiahnak in Khrih hnu zulmi maw kan si, zapi aw awn ngaih in a zulmi dah kan si?

Categories: Ministry

Leave a Reply