Thangthatnak Hman

Thangthat pumhnak i itel lo cu zumtu caah sia a rem lo. Thangthat ti awk ah pumhnak cu tuah a si. Mipum in i pumh tikah siseh online in i pumh tikah siseh i tel ning lungput aa dang theu. Hmunkhat ahcun ka thu ko hnga nain: Zeitikdah pumh aa thok cang lai ti aa ngaihmi le zeitikdah pumh a dih lai ti a hngakmi, ahodah thawngtha a chim lai, hla a sa lai ti a ngiami le zeitindah Pathian he kan i pehtlaih lai ti a ruatmi, pumh dih ah caan hmangtu kong caih le mawhchiat in caan a hmangmi le Pathian thangthatnak i itel khawh ruangah tha nuam in caan a hmangmi, hmai zarh pumh than ding kha tlangrian bantuk ah a ruatmi le a ngaih in a ngaihmi. Ahopaoh kap khat le kap khat ah um caan a um cio. Hmanhseh, thangthat (Worship) timi cu thinlung, ruahnak, mipum hrimhrim a dihlak in Pathian sin i hun i ap khi a si. Thangthat le biak (Worship) cu worthship a tlak ruangah Pathian sin i kan pek awk a si (Psalm 86:9-10).

Pathian thangthatnak ah thawngtha chim, hlasak, thlacam te pawl aa tel. Caan hmangtu zong an thiam ko lai. Thawngtha zong a tha ko lai. Thawhlawm zong a tam ko lai. A bau tawnmi cu mah le Pathian i pehnak a si theu. Thawngtha chimtu thiam le thiam lo kong hna ah buai deuh a si tawn. Rev. Jimmy Swaggart hi US AG evangelist minthang a si. TV in thawngtha a chim i vawlei ram 142 reng lo nih an ngaih. Kum khat i thawhlawm a hmuhmi hi Million 140 a si. Mipi nih an uar tuk. Ruah loin nu ah a tlu. A thawngtha a ngaitu, a uartu minung tam tuk a zawt hna i an zumhnak a rawk. A ruang cu thangthat timi an pemh lo caah a si. Minung tu an rak biak deuh. Atu ah Billy Graham tbt minthang pipi hna khi tlu hna hmanhsehlaw keimah le Pathian kaa pehtlaihnak cu chikkhat hmanh a rawk lai lo. Zeicahtiah cun, ka biakmi cu Pathian tu a si caah a si (James Merritt). Minung zoh, caan hmangtu zoh in Pathian thangthat i thawh ahcun rawl tam naloin rawl ei hngek he aa lo. Mah nun nih Pathian a fuh tikah thangthat tling a si.

Thla kan cam ahcun kan kup le kan kut thlir ah kan lung a um theu. Thawhlawm kan thawh lai ahcun a thluahchuah cungah kan khuaruahnak a um theu. Thangthat kan thok ahcun Amah Pathian sinah kan umek in a um awk a si (A. W. Tozer). Pastor Tozer tialmi ah roling mi hna cu: 1) Pathian ka zumhmi hi ka nunnak ah a biapibik a si, 2) Pathian kong kan ruah lio te i kan thinlung i a hung chuakmi khi kan nunnak kong ah a biapibik a si, 3) Harnak intuarter hmasa loin Pathian nih mi pakhatkhat thluachuah a pek lai ti cu lung a hring. Zumtu ciocio khua kan sak ti le kan thangthat ti tikah Pathian kha a laifang i kan chiah lo ahcun kan donghnak cu minung le minung cung peng ah a tla. Hmanseh, kan nun nih Pathian le a Bible bia kha a laimacer i a chiah ahcun thangthat nun biak nun timi cu a hung tling. Mithiang pawl nih 1 Thesalon 1:5, 2:13 ah Thesalon khrihfabu hna he a tahchunhmi kha a si. Zohchunhtlak khrihfabu an sinak cu minung ah siloin Thiang Thlarau sinin a rami Pathian bia lunglawm tein an cohlannak ah khan a si. Thangthatnak hman cu midang cungah a um lo, mah le Pathian i pehtlaihnak cungah a um.

Chirhchan:

https://en.wikipedia.org/wiki/A._W._Tozer

Categories: Sermon

Leave a Reply