Value in life

Thazang Petu Vanmi Kan Herh (We Need Encouragement)

• By Chan Lian
• 23 February, 2014
• No Comments

Keimah ve lo bang hitihin ka um hnga, tiin pasal thatha le nusal thatha hna an thazang a hung der tawn ve. Vawlei minung 100 ah 95 hi cu thaciat hmangmi an si an ti. Kan thazang a der lio teah thazang a kan petu cu Pathian vanmi an si. Kan thazang a der lioah a kan chapchin tu minung cu kan caah Satan an si. Billy Graham nih, Pathian cu a thazang a dermi hna kha a tungmer i rianlianngan caah a hmangtu, a si a ti. Minung cu thazang a der khomi kan si dih. Ka thazang a der tikah mi dang kan puh hna, kan mawh chiat tawn hna. A muru taktak cu kanmah kan chung in ai semmi a si, an ti. Wale nih a blog ah minung  tha  chiattertu phun sarih a tial.

1. Hmuhkhawhnak der: Hmailei ah thil hi a tlam a tling te ko lai timi zumhnak le ruahchank neih khawh lo.

2. Uahnak le tihnak: Ka palh sual lai, kai chuah sual lai i ka min chia sual lai timi i midang mithmai zohnak nih nunnak tei tuk.

3. Dai thlan: Tinhmi san ngai ko tung i thiamnak (skill) kawl lo. Khua lawng ruah peng i tuah thok bal lo.

4. Khuachia ruah: Caan dong lai, ka thi zau lai, zei paoh hi pakpalawng an si tiin vawlei thil vial te hi a chiatnak lawng tein hmuh.

5. Mahthawnnak i hngalh lo: Mah le mah bia ruah tik paoh ah mi tha lo, mi tling lo ka si timi lawng te nih tei peng.

6. Tuanbia chia nih uk: Hlan i rak ton balmi sunghnak, zatlaknak, ningzahnak hna faktukin tei i thil thar hrial rumro i timh.

7. Mah bantuk thazang dermi he i komh: Hawi komhmi hna kha kanmah bantuk thazang a dermi an si caah khuasik sem lawng i chap.

Minung a si mi paoh nih thazang dernak le der caan kan nei cio. Cu lio caan teah Pathian vanmi hawi kom kan herh. Thazang pekmi kan si caan a um bantuk in thazang petu zong si ding ah Pathian nih a kan fial. Midang kha thazang va pek kan timi cu an palhnak remh (correct) a si lo. Fimchimh le cawnpiak (educate) a si lo.  Mawtaw bettary a dihmi kha kanmawtaw bettary in tha kan pek bantukin kan thazang kha midang va cheuhbauh a si. Kan thazang cu Pathian a si i Pathian sin in kan hmuhmi zumhnak le ruahchannak le dawtnak kha kan cheuhbaoh hna awk a si. Thazang der lio caan i kan pawngah a ummi hawitha hna cu nunnak cheutu Pathian vanmi an si. Kanmah zawng midang caah Pathian vanmi si i zuam ve ding in kan sawm hna.