Thuhtlawrmi Thil Sunglawi

Mi a neng cemmi thil lakah pakhat cu mah nih thuh i mah lila nih hmuh ti lo hi a si. Mi a lawmhter bikmi pakhat bel cu minih rak thuhmi thil ihmuh a si ve. Kevin Hillier (1980) cu a keng ai cangh i rian a ttuan kho lo. Tuah awk hngalh loin Australia tlanglei tupi chungah a vak i thir umnak a thei kho seh in vawlei tang phummi thir a kawl. A sehte a awnhnak cu a cawh i sui tlang te ai hmuh. Las Vegas Casino ah $ dollar million pakhat ah a zuar (Reader’s Digest). Kum 85 mirum tarpa Forest Fenn nih sui $5 million man cu Rocky Mountain (Denver pawng)ah a phum. Naite 2020 ah min langhter duh lomi pa nih a hmuh. US ah cu bantukin an thuh ti hngalh ko nain hmuh rih lo mi pa hleili a um rih. Cu lak ah ka theih bikmi Chicago gangstar John Dellinger nih 1934 ah US dollars 200,000 cu cash in Manitowish Waters, Wisconsin pawngah a thuh. Thla thum hnuah amah cu FBI nih an thah. A thuh tami cu a tu tiang an hmu rih lo. California i ti laknak tuahtu John Sutter (1848) ca i riantuantu James Marshall nih ti an laknak ding tiva ah sui tlang a hmuh. US states kip le vawlei ram kip in cu sui cawh ahcun an ra i minung sing hnih tluk umnak California cu US khualipi nganbik pahnihnak i ai chuahnak cu a rak. 

Israel Jews mirum hna nih an suingun hna cu inn chungah an chia ngam lo. Damiah an tih, chungkhat an tih. Innpa an tih. A hleiin ral nih chuah lai an phang. Cutikah, an suingun hna cu ramlak ah an phum tawn. Ral an ra i an thah dih hna silole ruahloin an thi. An thuhnak hmun cu midang nih lohmun ah an i halh, lole an cawk. A lo chungah thil mansung a um ti kha longeitu nih a thei lo. Cu kong he tahchunh in Mathai 13 ah Jesuh nih Vancung Pennak kong a chim. Sui lungvar he a tahchunh. Ai hlawhfami pa nih a thuhmui in lo a thlawh i thuhmi thilmansung a hmuh tikah a ngeihmi dihlak a zuar i a lo ning piin a chawh, a ti. Fiang tein hmuhkhawhnak Thlarau mit nan ngeih ahcun Keimah hngalh, zumh le zulh hi nan caah thilman sungbik a si, a tinak a si cu a fiang tuk hringhran e. Zakia nih an ngeih vialte a siannak cu mah ruangah a si (Lk.19). A zultuhna nih an nunnak an sian cu mah ruangah a si.  Pathian pennak chung i hun luh cu a ruang ruang cungah ai hngat tilomi zungzal lomhnak nun co hram hun thok kha a si. Mah ca le mah ihumhaknak nun in isamh le midang ca i nun, nunhrawmh nun hun ngeih khi a si. Cu nun na ngeih tung lo ahcun vawlei nih harnak cu an pek peng sawhsawh ko lai. Nangmah ca lawngah na nung lai. nangmah ruangah na tuar lai. Duhtlinglo, lungsivang in na thi lai. Zungzal nunnak zong na sung lai.

Zumtu pakhat cu thuhmi rothil a hmutu a si ti lo. A hmu cangtu a si caah amah lila kha thuhmi rothil a si cang. Tih a nung bikmi zumtu nun cu hmuh khawh loin ai thup peng mi si kha a si. Man cu a ngei tuk ko nain hman awk a tha lomi phaisa tlau bantuk a si (Lk.15). Pennak chung i an luh taktak khawh lo caah uico le vok he tahchinh an si: “A thiangmi thil cu uico kha va pe hna hlah u — an i let lai i nanmah lehlam kha an in seh hna lai. Nan lungvar cu vok hmaiah va thla hlah u, vok nih cun a lamh in an lamh men ko lai (Mtt. 7:6). Mah ca lawngah a hrinthanmi, mah ca lawngah a kawlhawl mi hna nun cu hmaika ah chiahpiak cia mi thilman sung a sunlawi zia a thei rih lo mi nun a si. Na nun hi Pathian caah ai thup maw? Na Khrihfabu hi Pathian ramkauhnak caah ai thup maw? Khrih Jesuh zultu na sinak thawngin na comi thilman sung hna kha mi dang nih co ve hna seh tiah siaherhnak na ngei maw? Khrih thawngin a sunglawi tuk mi na si. Khrih nih an dawt i an fial ve.  Na caah thuhmi rothil tampi a um rih ti zawng philh hlah. Vawlei cung i a um cia mi thil vialte nak in Vancung ro a sung deuh i vawlei tang hell tih a nung deuh.

CTL

Categories: Uncategorized

Leave a Reply