Zeicaahdah Khamh Kan Herh

1. Mivialte hi sual ci he a chuakmi kan si i kan dihlak in misual kan si (Rome 3:23; 5:12). Minung a simi paohpaoh sualnak a tuah bal lo kan um lo. Lihchim, fir, duhfah hakkauh, phorhlawt ruamkai, mi nahchuah tbt pakhat khat a tuah bal lo, a ngei bal lo kan um lo. Kan sual dih. Cucu minung kan cikor bantuk a si i mi hmasa bik Adam sinin ai rak thok cangmi a si.

2. Pathian nih sualnak cu a huat nain misual cu a kan dawt. Sihmanhsehlaw kan sualnak le kanmah hi tthen awk kan ttha lo (Jer. 13:23, Job 25:6-7). Kan sualnak he tthen awk kan tthat lo caah Pathian nih kanmah cu kan daw ko hmanh sehlaw kan sualnak ruangah khamh tthiamtthiam kan hau.

3. Sualnak pakhat te tuah cu sualnak dang vialte tuah he ai khat (1 Cor. 6:9; Gal. 5:19-20). Tthatnak tampi kan tuah ko zong ah sualnak pakhat te kan tuahmi ruangah Hell kal ding kan si tthiam. Tthatnak le sualnak cuai thlai ti a um kho lo. Sualnak pakhat te kan tuah zong ah khamh tthiamtthiam kan hau.

Khamhnak Phunthum

1. Khamh cangmi sinak: Sualman Hell tla ding kan sinak chungin Khrih nih a kan khamh cang (Jn. 5:24; 1 Jn. 5:13). Khrih nih kan tuar ding a tuar cang i Pa Pathian sinah a thisen in a kan nawl piak cang caah a zummi vialte cu Pathian lungthin ah ngaihthiam kan si cang. Pathian nih kan sualnak kha a philh in a philh cang.

2. Khamh loimi sinak: Vawlei ah kan nun rih caah sual rianttuannak lakah a nung rihmi kan si (Rom. 6:14; Ps. 50:15). Khamh ciami kha sual rianttuannak ruangah tluk tthan a fawi te. Cucaah khamh liomi kan sinak ahhin kanmah rian kan ngei ve. I ralrin ding. Pathian he i peh peng ding. Thla cam peng ding. Thangtthatnak ah tthawn ding kan si.

3. Khamh laimi sinak: Hi vawlei hi kan inn a si zungzal lai lo. Ni ni khat ah Khrih nih a mi hna cu a hung kan lak lai (Heb. 9:28; Jn. 14:2-3). Vawlei ah harnak tong hmanh usih, ngaihchiatnak tong hmanh usih, sunghzathlaknak tong hmanh usih, kan lung dongh awk a si lo. Zungzal a hmunmi inn vanram ah kalpi ding lawngte kan si dih.

Rev. Dr. Paul Ceu Cawnpiaknak Chungin,
Sy Thawng

Categories: Artical

Leave a Reply