Christmas Na Zum Maw?

Nihin kan vawlei ah nifatin hngakchia 353,000 leng an chuak. A luan ciami kum 2000 leng i Judah hngachia Jesuh a rak chuah lio zongah hngakchia dang tampi an rak chuak ve ko. Zeiruangahdah Jesuh chuah camtuak te lawng hi vawlei pi nih zungkhar caan, dawr khar caan, rian tuan lo caan (Holiday) ah an chiah hnga? Minung mithmuh cun Jesuh cu Mary nih duh naloin awlokchawng in a hring mi sawhsawh a si. A pa Joseph zong nih lungtling lo ngaiin cohlan mi fa a si. Tom Flynn nih 1993 December thla ah X’mas hi lawm hlah uh, zeihmanh a si lo zumlotu kan caah, tiah ca a rak tial i meida tampi zongah a rak lar. Kanmah Laimi thawngthachimtu pakhat hnih zong nih X’mas tuah an doh. A chuahni taktak ai hngal lo an ti. Minung serchommi a si an ti. Khatte leiah, X’mas ni ai ngaih tukmi khrihfa tampi kan rak um ve. Thil thar le rawl thaw, din le ei, hawikom he nuamh lai kan i ngaih. Mah vialte hi December 25 ni ah ai zami kan si. Naute Jesuh chuah camtuak kan lomhmi cu Pathian a si komi minung i ai vun cannak tukha si.

Thong chungin tipil petu Johan nih Jesuh kong a theih. Jesuh sawhsawh maw, Jesuh taktak dah a si hnga ti theih a duhhringhran. Bia a hei thlami cu: ‘A ra dingmi cu nangmah hi na si maw, asiloah, midang dah kan hngah rih lai’ ti a si. Jesuh nih hitihin a leh: “Nan hmuhmi le nan theihmi hi Johan cu va chim ko u: mitcaw nih khua an hmuhnak le kebei an kal khawhnak le mithinghmui an thiannak le hnachet nih khua an theihnak le mithi thawhṭhan an sinak le misifak mi hna sinah Thawngṭha chim a sinak hi va chim ko u. Keimah kong ah lung awṭawmnak zeihmanh a ngei lomi cu a caah lunglawmh awk a va si dah,” (Mtt. 11:3-6). Mah hi kan caah X’mas a sunlawinak, kan caah thawngtha bik a si. Nauchuak thar cu an um lengluang ko lai. Nain X’mas tuahpiak ding a um bal ti lai lo. A ruang: Khrih cu Pathian fapa ngaihchun minung ah a hung i cangmi a si. Genesis in Malakhi chungah Jesuh ratnak ding kong chim chungmi voi 300 leng a um.

Jesuh a chuah hlan kum 700 ah Isaiah nih a ratnak ding kong chimtu tipil petu Johan kong a chim (40:3). Cu ve bantuk thiamthiam in Malakhi 3:1 ah kan tthiamtthiam. Cu bia hna a tlinnak cu Mtt. 3 le 11, Mk. 1, Lk. 1le 7 ah kan hmuh. Virgin nu chungin a chuak lai ti zong Ahaz siangpahrang sinah rak chim ciami a si (Isaiah 7:4). Cu bia a tlam a tlinak zong Mtt. 1:22 ah kan hmuh fawn. Bethlehem ah a chuak lai tiah prophet Micah hitihin a rak tial: Bethlehem Efrath, nangmah cu Judah ram chungah a hme bik khua hna lakah naa tel ve nain, nangmah chungin Israel uktu a chuak lai. Amah a hram cu kan hnuleipi caan, a luan cangmi caan chungah khan a um cangmi a si (5:2). Hi vial hmanh ahhin Khrih Pathian fa a sinak fiangtukin a lang. Zumtu kan sinak cu a saupi ko hmanhseh kan zumhmi a dik le a hman zia hi tutan X’mas ah a thar in fehter hna usih! Merry Christmas!

Categories: Uncategorized

Leave a Reply