Lungrethei In Um Hlah

Lungrethei berbu hin maw nitin kan nun lai? Kan lungretheih mi nih zeidah a chuah pi? Minung sining a hngaltu pawl nih 100 ah 40 kan lungretheihmi cu an cang tak bal lo. 100 ah 30 cu a luanciami kong an si. 100 ah 22 cu thil tetuai an si. 100 ah 8 lawnglawng hi fak deuh in ruah a tlakmi an si, an ti (Larry Moyer). George Gallup nih kum 95 a tling cangmi minung 402 cu zeiruang cem ahdah nan chan a sau, timi a hal hna. A tam u nih an lehnak cu nikhat ca lawngah kan nung i thaizing caah kan lungre thei bal lo, ti a si. US ah khua ka sa. Ti le rawl loin kan thi hraw rih lo. Sinain lungrethei berbur in kan nung peng sual maw? Inn man kan ruat, kan rian kan ruat, insuarnce a phunphun kong kan ruat. Sifak nih phaisa kongah an lungre thei. Mirum zong an duhzat an ngaih lo caah an lungrethei tthiam. Sibawi te nih an mizaw 100 ah 25 cu lungretheih thiamtuk ruangah a zawmi an si, an ti. Pathian fapa Jesuh Khrih nih minung kan sining a kan theih tuk caah, “Thaizing nih lungretheihnak cu a za in aa ngeih ve ko lai. Ni khat nih a chuahpimi harnak cung i a dang chonh chih lengmang hi a herh lo,” a kan ti (Mtt.6:35).

Hngakchia pa pakhat nih ka nu cu a lungretheihmi a tam tuk. Ka khuh ah TB na si sual hnga maw, a ti. Kan luh a fah deuh ah thluak cancer na si sual hnga maw, a ti. Lih ka chim sual ahcun politician (nyannganzi tama) na si te sual hnga maw, a ka ti a ti bal. Khrih zumtu a si mi paoh cu “Lungrethei awlokchong in um hlah u,” tiah Khrih nih a kan ti (v. 25). Vate kong a theitu pawl nih vate cu a paw kau taktakmi an si an ti. Va pakhat nih ni khat ah a pumnak in a let thum a ritmi rawl a ei khawh an ti. Va bantukin rawl ei ve usihlaw nihkhat ah pawng 300 in 500 kar kan ei ve hnga. Van vate zong rawl lo in a chia lo tu Pathian kan ngei. Kannih cu Pathian caah vawlei vate kan si. Amah thangtthat le a duhnak kawl hmasa tu kan herh. Thawngthachim thiam James Merritt nih: 1) Thil na thlen khawh komi kong ah zeitikmanh na lungrethei hlah. A kong ruah i lungretheihnak in a thlen tu thleng ko, 2) Thil na thlen khawh lomi cungah na lung thei fawn hlah. Na lungretheihmi nih zeihmanh a thleng hlei lo, a ti. Kanmah nih kan tuah khawh lomi thil cu Pathian sin tuah kan ap hna lai.

Ka zaw lai, ka thi lai ti zong phan awk a si lo. Kanmah nih kan ni le kan caan kan i khiak kho lo. A ni hna cu relpiak an si i a thla hna cu zeizat an si kha nangmah nih na hngalh; Nangmah nih a lonh khawh lomi ramri kha na serpiak (Job 14:5). Ka chuah hlan in na rak ka hmuh diam cang. Ka ca i na sermi ni hna cu na cauk chungah an rak i khumh diam cang, hram an i thawk hlan hmanh khan an i ṭial diam cang (Psalm 139:16). Moses nih Israelmi hna a hruai hna lioah minung  hi million pathum hrawng an si lai an ti. Cu zat minung nih nikhat an ei ding ah rawl ton 1500 a hau. Ti an din dingah gallon million 11 a hau. An i dinhnak ding ah Lairam nakin a ngan deuhmi hmun a hau. Sahrang ral le minung ral nih an kulh hna. Cuticun kum sawmli chung Pathian nih a cawm hna. Kan nunnak caah minung nih kan tuaktan khawhmi ti le rawl, phaisa le inn le lo lawng hi a rak si hrimhrim lo. Pathian i bochan le a duhnak kawl tu hi kan nunnak taktak a rak si deuh. Lungrethei berbur in um hna hlah usih! Pathian thangtthat le pennak kauhter tu i zuam ko hna usih. Bawipa nih ttuanvo a kan lak zungzal ko.

Categories: Uncategorized

Leave a Reply