Value in life

Mipem khrihfabu nih lungrual kan herh.“Member tam ah kan tthawng ti an chim ka theih bal. Cucu a hman thlu lo. Member a um zat te tu an ttan rual tikah tthawnnak (Power) a um. Tlakrawh tampi kha hmun dang cio i an um tikah vampang an sa kho lo. An i peh dih tik lawngah a fekpi vampang an sak khawh. Mah lawng um cu man a ngei lo,” (James Merrit). Member tam i lungrual lo, tlawm chinchin i lungrual lo hi ttih a nung, US phan Laimi tlawmte hi Khrih nih a thisen in a cawkmi Khrihfabu te lawngah kan ttan rual ttinak hmun a si. Kanmah le kan khrihfabu cioah ahhin ttang tti hna usih ti pin in chim din a um lo. Hi zawn ah kan herh bikmi cu Laimi dihlak, khrihfabu cio i komh tthannnak, mah meber cio i dawtnak le hmailei caah khuakhan ttuan ttnak hi a si. Cucu zeidang lungrualnak vialte siloin Khrih i pum khat ka sinak lawngin tuah khawhmi a si. Khrih ah unau a simi lungrualnak nih 1) Lomhnak, 2) Thluahcuahnak, 3) Chansaunak a kan pek lai, Bawipa biakamnak a si (Psalm 133).

Mah khuami silole rualchan lawng lungrual nak nih khrihfabu hna a hnawh ahcun lomhnak a um lo. Thluachuah a um lo. Caan sau a nguh lo. Cu ve bantukin, mifim thiam hna, a kan bawm khotu hna tuahserpiaknak ruangah upat nawlngeihnak men nih zumtu tak sinak a lei rawi. Sau a nguh lo. Mah duhnak, siam tlinnak men in khrifabu member sinak nih mipem Laimi kan hmailei ning a ttih ter. Sau a nguh lo. Khrih ah pumkhat kan sinak, mipem kan dirhmun i fiannak, kan fale ca i kan mission i fiannak le khrihfabu cungah lomhnak le kanmah kan thimmi hruaitu hna nawl zulhnak nih kan hmailei lam a tluanter lai timi zumhnak ka ngei. Democracy timi hi kan khrihfabu ah kan hman cio. A suallam cu (tampi lakah) a kan hruaitu dingah zapi nih duhmi thim le kan ruahnak cheuh khawh khi a si. Kan thimmi, kan auhmi hruaitu nih kanmah pumpak member cio duhnak tuah piak ding an si lo. An tuah kho fawn lai lo. Zapi caah a tthami tuahtu ding an si caah an nawl zulh ding a si. Upa thimmi zong nih upa sinak nakin Laimi kan khrihfabu hmuitinh phak pi ding hi bia pi deuh in ruah ding a si.

US pem kan duh dih. Zei thil paoh a tlam a tling dih lai tiah kan ruah. Van ram pahnihnak bang kan ruahchan. Kan hawile mipem cia nih an chimmi cu, US phak ah fim a si lo, rum zong a si lo. Thiam zong a si lo. Ngandam zong a si lo. Mi nih upat zong a si lo. Fim khur tein nun lo ahcun mang chia mangh i i tthangh khawgh lo he tu ai lo an ti (Korean Parent Research). Sinain US phanh i Pathian theih, a tthami thil i lak, khrihfabu ttha ngeih, cucu second heaven an ti. Laimi kan si nain Laimi san tlai lo kan si ahcun kan Lairam minung zong nih zei ah kan rel te lai lo. Hika US minung zong nih zei ah an kan rel fawn lai lo. Hi kong ah Vietnam hruaitu Peter Phan nih a chimmi cu: Vietnam kan si nain Vietnam nih zei ah rel lomi kan um. Cun US ah kan um nain Mirang zong ah an kan cohlang ve hlei lo a ti. Cu tikah minung lopi ah kan i cang. Sinain kan dirhmun kan i theih i khrihfabu te ah hmun khat le lung rual in kan dir ahcun Vietnam zong kan si i US sinak zong kan i hrawm caah a let in kan tthawng, a ti. A chim rihmi cu, Vietnam zumtu hna cu hruaitu bia an ngai. A ruang cu zapi him an duh. Cu caah rian lian pi kan ttuan kho, a ti. Lailmi mi tlawme te kan si hi philh hlah usih. Lungrual ah lomhnak, thluachuahnak, chansau nguhnak a um (Psalm: 133).