Tuu le Tukhal Dirhmun

Hi vialte saram lengluang lakah khrihfabu hi zeiruangah dah tuu le tuurun he a kan tahchunh hnga? Uico nih mi seh khawh, chizawh nih mi kheuh khawh, khacer nih mi perh khawh. Vok, rang, uico hna cu inn lawi nak an thei. Tuu cu a dermi, a hrutmi, a thlau lelek mi an si. A cawngtu nih tha tein a cawngh hna lo ahcun cenghnia, vom, chiandeih nih an seh hna i an nunnak a liam tuan. Tuu si i khaltu sinin thlau hi tih a nung (Psalm 119:17; Isaiah 53:6; 1 Peter 2:25). Cu nakin tih a nung deuhmi cu khaltu nei lomi tuu si khi a si (1Kings 22:17; Matthew 9:36). Sihmanhsehlaw tuukhal hruainak tangah tha tein a ummi tuu hna cu an him. Jesuh Khrih chan lioah tuu hna cu a sunglawi bikmi satil an si. An hmul in hnipuan thatha an ser. An hnuk an din hna. An sa cu rawlthawbik a rak si. Kannih khrihfa zong tuu he tahchunh kan si i kan tuukhal nganbik cu Khrih a si (1 Peter 5:4). Khrih kha kan sinah mithmuh in a um ti lo tikah amah a dawmi Peter kha ka tuu rak khal hna tiah a fial (John 21:16). Cucaah nihin kan mihmuh in a kan khaltu hna cu Khrihfabu nih kan fialmi hna pastorte an si. Tuu rawl pek timi “Feed” i a noun form cu “Pastor” ti a si caah Pastor tiin kan auh hna. Company nih pastor an herh lo. Khrihfabu bel pastor lo cun khaltu nei lo tuurun ban tuk a si ve.

Tuu le tuukhal dirhmun kong ah Bible nih fiang tein a kan cawnpiak (1 Peter 5). Tuukhal cu Khrih temtuarnak le sunparnak a pahhnih in a fiang i a keneh zulh a duhmi a si lai. Khrih caah intuar a ngamh lai i a sunparnak i hrawm ding zong ai ruah chih lai. Khrih thawngtha in a tuurun rawl a pe huam pengmi a si lai. Tuurun hruaitu a si lai. Nain a uk in a uk hna lai lo, tuurun herhmi rian tuanpiak buin a hruai hna lai (Servant Leader). Tuurun nih an hmuhmi nakin a let khat hmuh awk ah ai tlak nain hmuh duh ah a tuanmi tuukhal a si lai lo. Tuurun caah zeidah siorawl a si i zeidah rawl taktak a si ti a hngaltu cu tuukhal a si. Zeicahtiah tuukhal cu Pathian nih khrihfabu caah a orhleikut aiah a hmanmi hna an si. Cucaah tukhal nih tuurun cu rawl a pek hna lawng siloin a ven hna lai. Tuurun nih tuukhal cu an hngalhmi a si lai. An hngalh i an sawm, cohlannak le Pathian sin namhnehnak a um tikah tuukhal tling a si. Tuurun hna i kan rian nganbik cu kan tukhal hngalh i a hnu zulh a si. Tuukhal ṭha cu keimah hi ka si. Pa nih a ka hngalh i keimah nih Pa ka hngalh ve bantukin, ka tuu kha ka hngalh hna i annih nih an ka hngalh ve. Cun an ca i ka lu hloh kha ka sian (John 10:15). Tuurun caah pastorte nih kan lu kan hlo siang ve maw? Tuurun nih teh tuukhal hruainak tangah kan um duh ve maw? Mi pakhat nih hitihin a chim: Nan tuukhal i an hruainak kha nan zulh duh tung lo ahcun phuak ko uh. Silole Pathian nih a hman ko ti nan zumh ahcun a hnu zul ko uh.

 

Nihin khrihfabu tampi ah tuurun le tuukhal kan dirhmun ai cuhkalh theu tawn. Andrian Rogers hi Baptist pastor minthang pakhat dirhmun a nei ngaimi a si. Khrihfabu kongah a hmuh ning hi van ruat ve. America ram chung khrihfabu a thangchomi le Pathian nih a hman timi vialte khi zoh hmanh uh, tuukhal hruainak in a kalmi lawngte an si. Cubantukin khrihfabu tuanbia zoh than zong ah a si thiamthiam. Ka khrihfabu hna an cungah kai lawm. Riantuan ti hawi lawng siloin hawikom tha ah an cang dih. Pathian zong an i bochan. Kei zong nih ka bochan ve hna. Asianin zeitikhmanh ah khrihfa upa tangah a kun i anmah nih hruai ding ka si lo. Khoika khrihfabu i ka va tuan zong ah Khrihfa upa nih hruai ding ka si lo. Khrihfabu a neitu Jesuh Khrih tang lawngah a kun ding ka si. Hihi nawl neih ka duh le mi uk ka duh ruangah siloin tuu le tuukhal dirhhmun Cathiang nih a chimning te a si caah a si. Hnu zulh awk a tlak lo nan ka ti ahcun ka phuak ko uh. Lam kam zong ah Pathian bia cu ka chim ko lai. Committee tangah pastor a chiami bu paoh ah buainak a tam deuhdeuh ti cu mithmuh kut tawngh a si. Hi bantukin Vietnam theologian Peter Phan nih, Vietnam American pastor pawl rian tam chinchin kan tuan khawhnak cu tuurun nih kan nawl an ngaih caah a si tiah a tial ve. Ahopaoh nih kan khrihfabu tha seh, thawng seh ti kan duh cio. A tanh zia kan thiamnak hnga Pathian nih thlua kan chuahpiak ko seh!

Categories: Artical

Leave a Reply