Value in life

Monkey’s Way of Catching Fish (Zawng Para Thlei)

• By Chan Lian
• 11 January, 2013
• No Comments

 Zawt zual ngai ko zong ah phaisa ka dih sual lai tiin siikhan ah ai piah duh lomi mi tampi ka theih hna. An tak pum nih a celh bak ti lo hnu ah siikhan tho cu va phak a si. Ka dih lai ti a phanmi nak tam chinchin a dih. Takpum nih a hlei in a tuar fawn. A herh lo tiangin semrel hi zawng para thlei a si ka ti.

Mawtaw a nei nain insurance lak a duh lomi tampi ka theih hna. A si khawh lo caah one way lawng a lami zong tampi ka theih hna. Phaisa tlawmte khon duh ruangah thirphang lengmang in mawtaw mawngh a hau. Khawnden sual an ton tiik ah an khonmi nakin tam deuh ving an liam. A sithiam nalo ningin khir cu hruh ralthat a si ka ti.

Rian a har tuk ko nain lahkhah ruah ah ai hnek i a tuanmi tampi ka theih hna. Rian fawi deuh hlawh niam deuh in tuan awk a um zong ah lungkil ne tein phaisa a ruat pengmi  zong ka theih hna. Phaisa kawlnak caah holhthiam hna i zuam lo, rian thiam hna i zuam lo in mah mipum bak thap ngamh cu tuk a sum ka ti. Kum nga chung an hmuhmi  cu a tam lai nain an pum der thawm tik kong ruah ah thling a za ka ti.

Mah herhbau le duhherh lawnglawng faktukin a ruatmi tampi ka theih hna. Phaisa an hmuhmi a tlawm ah an lungre a thei, a tam an hmuh ah i khawnnak le hmannak ah an lungre thei thiamthiam. Lungre theih pinah an tuah khawhmi cu cheuhracheu khat pek lo a si. Zeizong vialte a nei tu, damnak, thihnak nunnak biakhiaktu Pathian caah chawva va pek tiang siang lo lakin khuasak ruah hi cu zawng para thlei a si ka ti. Leikuang kaupi neih i tilam cawh duh lo he ai lo. Mah le mah thluachuah kan i phih piin ah i phuhrung ngaiin nun peng  cu hngar awk a um lomi nunnak a si.